Kva brast så høgt?
Skiltet til Sunnmørsbanken vert teke ned og erstatta med Kreditkassen. Fotoet er frå Ålesund sommaren 1990.
Kva brast så høgt?
Banksjef Ola Skjåk Bræk brukte ordvekslinga mellom Einar Tambarskjelve og Olav Tryggvason då han skulle forklare kva som gjekk gale med Sunnmørsbanken, den største banken mellom Trondheim og Bergen.
Ola Skjåk Bræk var ein banksjef som heldt på gamle varsame prinsipp for bankverksemd. Han meinte det var betre å skaffe pengar frå Oslo til utlån til næringslivet på Sunnmøre framfor å ha ein filial i Oslo for å låne pengar dit. Han var redd for at utlån i Oslo ville føre til store tap for ein bank som hadde til hovudoppgåve å hjelpe fram vårt eige lokale næringsliv. Jappetida var prega av ein vill vekst i bankutlån. Etterkomarane til Skjåk Bræk oppretta filialar både i Oslo og Bergen. Utlåna der skulle påføre banken store tap. Tapa var så store at banken ikkje lenger kunne halde fram som eigen bank, men vart kjøpt opp av Kreditkassen. Seinare skulle Kreditkassen gå inn i banksamanslutninga Nordea.